Inspektorati Policor i Kosovës (IPK) ka nisur një hetim paraprak për të verifikuar nëse ka pasur lëshime ose përfshirje të mundshme të pjesëtarëve të Policisë së Kosovës në veprimtarinë kriminale të një të dyshuari të shpallur në kërkim për vrasjen trefishtë që ndodhi në Gjilan.
Për të siguruar integritetin e hetimeve dhe për të shmangur çdo ndikim mbi dëshmitarë ose prova, IPK ka rekomanduar suspendimin e katër zyrtarëve policorë të Drejtorisë Rajonale të Policisë në Gjilan. Rekomandimi është zbatuar nga Policia e Kosovës, duke përfshirë:
-
Një rreshter policor dhe një hetues nga Njësia e Hetimeve Rajonale, Drejtoria Rajonale e Gjilanit;
-
Një rreshter policor, shef i hetimeve në Stacionin Policor të Novobërdës;
-
Një zyrtar policor i Njësisë së Reagimit të Shpejtë, Drejtoria Rajonale e Gjilanit.
IPK, në bashkëpunim me Kryeprokurorin e Prokurorisë Themelore të Gjilanit, po zhvillon hetime penale paraprake ndaj të suspenduarve për dyshime të përfshirjes në veprimtari të kundërligjshme me elemente të veprës penale. Hetimet janë ende në fazën fillestare dhe përfshijnë mbledhjen e provave materiale, marrjen e deklaratave dhe veprime të tjera procedurale.
