Përplasjet në Lindjen e Mesme po përshkallëzohen, ndërsa Irani vazhdon sulmet ndaj bazave ushtarake amerikane në rajon dhe kërcënon drejtpërdrejt kryeministrin e Izraelit, Benjamin Netanyahu.
Shpërthime janë raportuar në Bahrein dhe në disa vende të tjera të rajonit, ndërsa raketa dhe dronë janë kapur nga sistemet e mbrojtjes ajrore në Arabia Saudite, Kuvajt dhe Jordan.
Garda Revolucionare merr përgjegjësinë për sulmet
Korpusi i Gardës Revolucionare Islamike deklaroi se sulmet e fundit kishin në shënjestër tre baza amerikane në rajon, duke përfshirë objektiva në Kuvajt, Irak dhe Izrael.
Në një deklaratë tjetër, kjo forcë elitare iraniane kërcënoi drejtpërdrejt Netanyahun, duke thënë se do ta ndjekë dhe do ta vrasë atë.
“Pasiguria rreth fatit të kryeministrit kriminal sionist dhe mundësia e vdekjes ose arratisjes së tij tregojnë krizën e thellë të regjimit sionist. Nëse ai është ende gjallë, ne do ta ndjekim dhe do ta eliminojmë”, thuhet në deklaratë.
Trump refuzon negociatat me Iranin
Presidenti i SHBA-së, Donald Trump, në një intervistë për NBC News, hodhi poshtë mundësinë e bisedimeve me Teheranin për t’i dhënë fund luftës.
Ai deklaroi se aftësitë ushtarake të Iranit mund të neutralizohen shpejt, veçanërisht në zonën bregdetare.
“Nëse marrim kontrollin e bregdetit, ata nuk do ta kenë më atë fuqi”, tha Trump.
Thirrje për flotë ndërkombëtare në Hormuz
Trump gjithashtu u bëri thirrje vendeve të prekura nga kriza energjetike të dërgojnë anije luftarake për të mbrojtur Ngushticën e Hormuzit, një korridor strategjik për transportin global të naftës.
Ai theksoi se SHBA do të bashkëpunojë me vendet aleate për ta mbajtur këtë rrugë detare të hapur dhe të sigurt.
Sipas mediave iraniane, Trump ka kërkuar mbështetje edhe nga Kina dhe vendet evropiane për këtë operacion detar.
Pasiguri për liderin suprem të Iranit
Pas vdekjes së liderit suprem Ali Khamenei, në pushtet ka ardhur djali i tij, Mojtaba Khamenei.
Megjithatë, sipas Trump, ka dyshime se ai mund të jetë plagosur rëndë dhe nuk është shfaqur publikisht.
“Nuk e di nëse është ende gjallë. Askush nuk ka qenë në gjendje ta konfirmojë”, tha presidenti amerikan.
Ndërkohë, lufta që nisi më 28 shkurt me sulmet e koordinuara të SHBA-së dhe Izraelit ndaj Iranit po zgjerohet në gjithë rajonin, duke rritur rrezikun e një konflikti shumë më të madh në Lindjen e Mesme.
