Ish-kryeministri i Kosovës, Isa Mustafa, ka reaguar përmes një postimi në profilin e tij në Facebook lidhur me sjelljen e Qeverisë në detyrë ndaj vendimeve që lidhen me përputhshmërinë kushtetuese të funksioneve ekzekutive dhe legjislative.
Në postimin e tij, Mustafa rikujton se në vitin 2017, në prag të certifikimit të rezultateve zgjedhore, kishte ndërmarrë masa konkrete për të respektuar Kushtetutën, duke liruar nga detyra zëvendëskryeministrin dhe tetë ministra të cilët kishin fituar mandatin si deputetë.
“Në konsultim me Zyrën Ligjore të Kryeministrisë dhe me këshilltarin juridik të Kryeministrit – i cili sot është kryetar i Odës së Avokatëve – dhe në përputhje me nenin 72 të Kushtetutës, si kryeministër në detyrë, i kam liruar nga detyra një zëvendëskryeministër dhe tetë ministra që kishin fituar mandatin e deputetit,” shkruan Mustafa.
Ai thekson se ky veprim nuk ishte bërë për të dhënë shembull të zbatimit të Kushtetutës, por për të parandaluar shkeljen e saj.
“Qeveritarët e liruar nga detyra ishin: Ramiz Kelmendi, zëvendëskryeministër, dhe ministrat dr. Kujtim Shala, dr. Avdullah Hoti, dr. Enver Hoxhaj, dr. Lutfi Zharku, Memli Krasniqi, dr. Hykmete Bajrami, Arban Abrashi dhe Rasim Demiri,” shton ai.
Mustafa kujton se edhe pse në atë kohë Kosova nuk kishte ende Ligjin për Qeverinë, vendimi u bazua në frymën e Kushtetutës, e cila nuk lejon ushtrimin e njëkohshëm të funksioneve ekzekutive dhe legjislative. Ai përmend edhe vendimin e fundit të Gjykatës Supreme që, sipas tij, e ka konfirmuar këtë ndalim.
“Qeveria në detyrë nuk duhet t’i lejojë vetes veprime antikushtetuese dhe të qëndrojë në pushtet në shkelje të ligjit,” përfundon Mustafa, duke shtuar se “brishtësia e fuqisë pushtetore provohet më së miri kur bie nga pushteti – jo vetëm për të marrë përgjegjësi për veprimet joligjore, por edhe për pasojat që shkaktohen nga mospërfillja e gjyqësorit.”
Postimi i plotë i Isa Mustafës është marrë nga profili i tij zyrtar në Facebook, ku ai vazhdon të shpreh opinionin e tij për zhvillimet aktuale politike në vend.
