Ish-ambasadori i Shqipërisë në Maqedoninë e Veriut, Arben Çejku, ka deklaruar se ortodoksët shqiptarë janë grupi më i persekutuar në këtë vend. Ai bëri këto komentime gjatë pjesëmarrjes në emisionin “Një Shqipëri” në Radio Televizionin Shqiptar (RTSH).
Çejku theksoi se, në një “piramidë të persekucionit” në Maqedoninë e Veriut, ortodoksët shqiptarë janë ata që kanë pësuar më shumë, pasuar nga shqiptarët dhe më pas nga grupet e tjera, përfshirë maqedonasit, kosovarët dhe të tjerë. Ai shtoi se ky përndjekje ka pasur gjithmonë një rend dhe se është e rëndësishme që të shohim këtë çështje pa ethet nacionaliste, duke u përballur me faktet.
Problemi nis në Tiranë, sipas Çejkut
Sipas Çejkut, problemi i persekutimit të shqiptarëve ortodoksë në Maqedoninë e Veriut nuk është vetëm një çështje e këtij vendi, por një problem që fillon në Tiranë. Ai kritikoi institucionet shkencore shqiptare, të cilat, sipas tij, nuk kanë zhvilluar studime të thelluara mbi këtë temë, duke e lënë këtë çështje të mbetet nën ndikimin e propagandës politike dhe diskutimeve të njëanshme.
Ish-ambasadori theksoi se ky problem duhet të trajtohet në një diskutim historik dhe të përfshihet në studime akademike serioze, duke përmendur përplasjet e tij në lidhje me Enciklopedinë e Maqedonisë, e cila ka krijuar një ngatërrim të mëtejshëm rreth çështjeve të historisë dhe identitetit.
Ai shprehu gjithashtu keqardhjen për mungesën e një debati të hapur dhe të thelluar nga Akademia e Maqedonisë së Veriut, që mund të kishte ndihmuar në një kuptim më të qartë të situatës dhe pasojave të persekutimit të shqiptarëve ortodoksë në këtë vend.
