Nga viti 2026, shoferët në Itali nuk do të duhet më të “hashin shpenzimet” për radhët e gjata apo trafikun e mbingarkuar. Agjencia Italiane e Rregullimit të Trafikut ka prezantuar një sistem revolucionar që do të kthejë automatikisht paratë e taksës së autostradës sa herë që udhëtimi zgjatet përtej normales për shkak të punimeve apo bllokimeve të rënda.
Ky model, i pari i këtij lloji në Evropë, llogarit kohën e pritshme të lëvizjes dhe e krahason atë me kohën reale të udhëtimit. Nëse diferenca është e konsiderueshme – sistemi e aktivizon automatikisht rimbursimin, pa aplikime, pa formularë dhe pa stres.
Si do të funksionojnë rimbursimet?
Rregullorja përcakton qartë kriteret sipas gjatësisë së segmentit të përshkuar:
-
0–30 km: rimbursim automatik, pavarësisht kohëzgjatjes së vonesës
-
30–50 km: rimbursimi aktivizohet nëse ka minimum 10 minuta vonesë
-
Mbi 50 km: e drejta për rimbursim fillon pas 15 minutash vonesë
Autoritetet italiane thonë se sistemi garanton “kompensim të drejtë dhe transparent”, duke mbrojtur drejtuesit e automjeteve në situata ku trafiku u kushton kohë dhe para.
Kur fillon zbatimi? Në dy faza
-
1 qershor 2026: nis zbatimi në autostradat me një operator të vetëm
-
2 dhjetor 2026: shtrihet edhe në rrugët me disa koncesionarë
Përjashtime bëjnë vetëm situatat emergjente: aksidente, mot ekstrem, operacione shpëtimi – raste ku rimbursimi nuk do të lëshohet.
Të gjitha proceset e regjistrimit, matjes së kohës dhe rimbursimeve do të menaxhohen përmes një aplikacioni unik të rrjetit italian të autostradave. Rregullat do të integrohen detyrimisht në kontratat e reja të koncesioneve, ndërsa për ato aktuale do të zbatohen marrëveshje të posaçme.
Salvini: “Moment historik për drejtuesit e mjeteve”
Ministri italian i Transportit, Matteo Salvini, e quajti reformën “një moment historik” që më në fund u jep shoferëve drejtësi dhe kompensim kur rrugët i vonojnë më shumë se ç’është e pranueshme.
