Izraeli dhe Hamasi do të zhvillojnë të hënën në Egjipt raundin e ri të bisedimeve për armëpushim, nën ndërmjetësimin e SHBA-së, me synimin për t’i dhënë fund luftimeve në Rripin e Gazës.
Burime diplomatike bëjnë të ditur se diskutimet do të përfshijnë edhe një marrëveshje të mundshme për shkëmbimin e pengjeve izraelite të mbajtura në Gaza me të burgosur palestinezë.
Kryeministri izraelit Benjamin Netanyahu konfirmoi të shtunën se po dërgon një ekip në Egjipt “për të finalizuar detajet teknike”, duke theksuar se synimi është që negociatat të përmbyllen “brenda disa ditësh”.
Hamasi ka mbajtur pengje që nga sulmi i 7 tetorit 2023 ndaj Izraelit. Grupi militant ka deklaruar se është gati t’i lirojë të gjithë pengjet, pas prezantimit të “planit të paqes për Gazën” nga presidenti amerikan Donald Trump të premten — një nismë që është pritur pozitivisht nga disa liderë evropianë.
Pavarësisht thirrjes së Trump për ndalimin e bombardimeve, sulmet izraelite në Gaza vijuan edhe të shtunën, ku dhjetëra persona mbetën të vrarë. Ndërkohë, grupi Huthi i Jemenit lëshoi një raketë drejt Izraelit, e cila u interceptua nga mbrojtja izraelite, raportoi Al Jazeera.
Në delegacionin izraelit do të jetë ministri i Çështjeve Strategjike Ron Dermer, ndërsa pala e Hamasit pritet të përfaqësohet nga Ghazi Hamad, Osama Hamdan dhe Muhamed Darwish, sipas mediave lokale.
Shtëpia e Bardhë ka njoftuar se Trump ka dërguar në Egjipt dy përfaqësues: Steve Witkoff, negociator amerikan për Lindjen e Mesme, dhe Jared Kushner, dhëndri dhe këshilltari i tij i ngushtë.
Në një postim në rrjete sociale, Trump deklaroi se Izraeli “ka rënë dakord për vijën fillestare të tërheqjes”, të cilën SHBA-ja ia ka paraqitur Hamasit. Sipas tij, armëpushimi do të hyjë në fuqi sapo Hamasi të konfirmojë pajtimin, dhe menjëherë më pas do të nisë shkëmbimi i pengjeve dhe të burgosurve.
Sipas draftit të planit të paqes, Gaza do të qeveriset nga një “komitet palestinez teknokratik dhe apolitik”, nën mbikëqyrjen e një organi ndërkombëtar të udhëhequr nga presidenti i SHBA-së.
