Pas disa ditësh përplasje të përgjakshme që morën jetën e mbi 300 personave, Izraeli dhe Siria kanë arritur një marrëveshje për armëpushim. Lajmi u bë i ditur të premten nga i dërguari i SHBA-së në Turqi, Tom Barrack, i cili konfirmoi se marrëveshja është mbështetur nga Turqia, Jordania dhe vendet fqinje të rajonit.
Të mërkurën, Izraeli kishte nisur një fushatë të sulmeve ajrore ndaj Damaskut dhe pozicioneve qeveritare në jug të Sirisë, me pretendimin për mbrojtjen e komunitetit druz, një pakicë me ndikim që ka përfaqësim edhe në Liban dhe Izrael.
“U bëjmë thirrje druzëve, beduinëve dhe sunitëve që të ulin armët dhe së bashku me pakicat e tjera të ndërtojnë një identitet të ri dhe të bashkuar sirian”, deklaroi Barrack përmes një postimi në platformën “X”.
Si pjesë e marrëveshjes, Izraeli është zotuar të lejojë një prani të kufizuar të forcave siriane në zonën e Sweida-s në Sirinë jugore për një periudhë 48-orëshe. Sipas një zyrtari izraelit, i cili foli në kushte anonimiteti, kjo masë është e përkohshme dhe synon të shmangë përshkallëzimin e mëtejmë.
Presidenca siriane, nga ana e saj, ka njoftuar se do të vendosë forca shtesë në jug të vendit për të garantuar siguri dhe për të parandaluar rikthimin e dhunës, në koordinim me masat politike dhe të sigurisë.
Në fillim të javës, trupat siriane u akuzuan për shkelje ndaj civilëve druzi, çka nxiti ndërhyrjen ushtarake të Izraelit dhe intensifikoi përplasjet.
Në një zhvillim paralel, Presidenti i SHBA-së, Donald Trump, ka bërë të ditur se së shpejti pritet të lirohen edhe 10 pengje nga Rripi i Gazës. Ndonëse nuk dha detaje të mëtejshme, mediat amerikane raportojnë se çështja u diskutua gjatë një darke me ligjvënësit në Shtëpinë e Bardhë, ku presidenti vlerësoi përpjekjet e të dërguarit të tij të posaçëm, Steve Witkoff.
Ndërkohë, negociatat mes përfaqësuesve izraelitë dhe atyre të Hamasit vazhdojnë në Doha, ku po shqyrtohet një propozim amerikan për një armëpushim 60-ditor në Rripin e Gazës.
Zhvillimet e fundit pritet të sjellin një qetësim të përkohshëm në një rajon të trazuar prej muajsh.
