Izraeli po ndërton një rrjet prej 32 pikash ushtarake brenda Rripit të Gazës, duke e kthyer vijën ndarëse në atë që zyrtarët e konsiderojnë si “kufiri i ri” në terren.
Sipas raportimeve, pozicionet përfshijnë llogore, barriera dhe struktura të fortifikuara përgjatë një zone rreth 16 kilometra të gjatë, duke krijuar një ndarje të qartë mes zonave të kontrolluara nga ushtria izraelite dhe atyre ku vepron Hamasi.
Plan afatgjatë, jo vetëm masë e përkohshme
Këto zhvillime sinjalizojnë një ndryshim strategjik. Ajo që dikur ishte një vijë e përkohshme sigurie, tani po shndërrohet në një prani të qëndrueshme ushtarake.
Kryeministri Benjamin Netanyahu ka kushtëzuar çdo tërheqje me çarmatosjen e Hamasit, duke shprehur dyshime se një forcë ndërkombëtare mund ta realizojë këtë objektiv.
Ndërkohë, një plan i propozuar nga Donald Trump parashikon dorëzimin e armëve nga militantët brenda gjashtë muajve, por është refuzuar si “jorealist”.
Tunelët dhe kërcënimi i vazhdueshëm
Një tjetër shqetësim për Izraelin mbeten rrjetet e tuneleve nëntokësore, ku besohet se rreth 150 kilometra ende nuk janë shkatërruar. Këto struktura konsiderohen kërcënim strategjik dhe justifikim për vazhdimin e operacioneve.
Zyrtarë ushtarakë kanë paralajmëruar se rifillimi i ofensivave është vetëm çështje kohe.
Situata humanitare përkeqësohet
Ndërkohë, realiteti në terren mbetet i rëndë. Në një territor të vogël, mbi dy milionë banorë jetojnë në kushte ekstreme — shumë prej tyre në çadra ose rrënoja.
Shkatërrimi i gjerë dhe mungesa e ndihmave humanitare janë përkeqësuar edhe më shumë nga përshkallëzimi i konfliktit rajonal, sidomos përplasja me Iranin, që ka zhvendosur vëmendjen ndërkombëtare.Burimi: Corriere della Sera
