Izraeli ka vënë zyrtarisht në funksion sistemin e ri të mbrojtjes ajrore me energji lazer, të quajtur Iron Beam, duke u bërë vendi i parë në botë që disponon një armë lazer operative për interceptimin e kërcënimeve ajrore.
Sipas Ministrisë së Mbrojtjes së Izraelit, sistemi iu dorëzua Forcave Ajrore izraelite gjatë një ceremonie zyrtare të mbajtur në veri të vendit. Lajmi është konfirmuar edhe nga The Times of Israel.
Projekti Iron Beam është zhvilluar nga Drejtoria për Kërkim dhe Zhvillim e Ministrisë së Mbrojtjes, në bashkëpunim me kompaninë shtetërore të industrisë së mbrojtjes Rafael.
Ministri izraelit i Mbrojtjes, Israel Katz, deklaroi se sistemi ka arritur “pjekuri të plotë operacionale” dhe ka realizuar me sukses disa ndërhyrje reale ndaj objektivave ajrore.
“Për herë të parë në nivel global, një sistem interceptimi me lazer me fuqi të lartë është futur në përdorim operacional. Ky është një mesazh strategjik për armiqtë tanë,” tha Katz.
Edhe kryetari i bordit të Rafael, Yuval Steinitz, e cilësoi Iron Beam si një moment historik për mbrojtjen moderne.
“Izraeli është shteti i parë që ka futur në shërbim një sistem lazer për neutralizimin e raketave, predhave dhe kërcënimeve ajrore të tjera,” u shpreh ai.
Plotësim i “kupolës” ajrore izraelite
Iron Beam do të funksionojë si pjesë e arkitekturës shumë-shtresore të mbrojtjes ajrore të Izraelit, duke plotësuar sistemet ekzistuese si Iron Dome (kërcënime me rreze të shkurtër), David’s Sling dhe Arrow (raketa balistike).
Ndryshe nga sistemet tradicionale që përdorin raketa mbrojtëse të shtrenjta, Iron Beam përdor energji elektrike për të shkatërruar objektivat, çka pritet të ulë ndjeshëm koston për çdo interceptim dhe të rrisë efikasitetin në përballjen me sulme masive.
Ekspertët e sigurisë vlerësojnë se futja e këtij sistemi shënon një kthesë strategjike në luftën ajrore moderne dhe mund të ndryshojë balancat ushtarake në rajon dhe më gjerë.
