Tensionet në Lindjen e Mesme janë rritur sërish pasi Izraeli ka ndërmarrë një tjetër sulm ajror në kryeqytetin sirian, Damask, duke goditur, sipas burimeve të sigurisë, Ministrinë e Mbrojtjes së Sirisë.
Dy burime të sigurisë, të cituara nga mediat ndërkombëtare, kanë konfirmuar se sulmi kishte për objektiv strukturat ushtarake të regjimit sirian, ndërkohë që raportohet për viktima dhe të plagosur në radhët e forcave të sigurisë.
Sipas agjencisë së lajmeve Reuters, një shpërthim i fuqishëm është dëgjuar në Damask në orët e pasdites të së mërkurës, ndërsa autoritetet siriane kanë deklaruar se bëhet fjalë për një sulm ajror të ri nga Izraeli.
Sulmi pason bombardimin e hyrjes së Ministrisë së Mbrojtjes
Pamje të shpërndara në rrjetet sociale nga burime izraelite dhe arabe tregojnë momentin e sulmit, i cili ndodhi vetëm pak orë pas një tjetër bombardimi që kishte shënjestruar hyrjen e godinës qendrore të Ministrisë së Mbrojtjes në një nga sheshet kryesore të Damaskut.
Deri tani, autoritetet siriane nuk kanë dhënë një numër zyrtar të viktimave, ndërsa observatorët e pavarur të të drejtave të njeriut në Siri kanë raportuar për dëme të mëdha materiale dhe zhvillime të vazhdueshme të operacioneve ushtarake në rajon.
Pritet reagimi ndërkombëtar
Ky eskalim i ri vjen në një moment delikat për rajonin, ndërsa sulmet izraelite në territorin sirian janë shtuar ndjeshëm gjatë muajve të fundit, kryesisht ndaj strukturave që lidhen me Iranin dhe Hezbollahun, të cilat Izraeli i konsideron si kërcënime të drejtpërdrejta për sigurinë e tij.
Ende nuk ka një reagim zyrtar nga qeveria izraelite, por analistët paralajmërojnë se kjo përshkallëzim i qëllimshëm në Damask mund të sjellë pasoja më të gjera në arenën gjeopolitike të rajonit.
