Kabineti i Sigurisë i Izraelit ka miratuar një plan strategjik për të marrë kontrollin e Qytetit të Gazës, në atë që konsiderohet si faza e parë drejt një operacioni më të gjerë ushtarak në Rripin e Gazës. Vendimi u bë i ditur nga zyra e Kryeministrit Benjamin Netanyahu, duke theksuar se plani është miratuar me shumicë votash në kabinet.
“Kabineti i sigurisë i miratoi planet me shumicë votash dhe përfshin pesë parime për t’i dhënë fund luftës”, thuhet në deklaratën zyrtare. Ndërkohë, Forcat e Mbrojtjes së Izraelit (IDF) janë urdhëruar të përgatiten për marrjen e kontrollit të Qytetit të Gazës, njëkohësisht duke ofruar ndihmë humanitare për civilët jashtë zonave të luftimit.
Pesë pikat e planit:
-
Çarmatimi i Hamasit
-
Kthimi i të gjithë pengjeve – të gjallë dhe të vdekur
-
Demilitarizimi i tërësishëm i Rripit të Gazës
-
Vendosja e kontrollit të sigurisë izraelite mbi Rripin e Gazës
-
Krijimi i një qeverie alternative civile, që nuk përfaqëson as Hamasin, as Autoritetin Palestinez
Sipas deklaratës, shumica absolute e ministrave në kabinetin e sigurisë kanë refuzuar planin alternativ të paraqitur, duke argumentuar se ai nuk do të garantonte humbjen e Hamasit dhe kthimin e pengjeve.
Përkundër deklaratave të mëhershme të Netanyahu-t për marrjen e të gjithë Rripit të Gazës, plani i miratuar fokuson operacionin fillestar në Qytetin e Gazës, qendra më e madhe urbane e enklavës palestineze.
Sipas raportimeve të BBC, kjo lëvizje e re strategjike shihet si paralajmërim për një ofensivë të plotë dhe të përshkallëzuar të Izraelit në Gaza, ndërkohë që situata humanitare në terren vazhdon të jetë alarmante.
Kjo nismë e re nga Tel Avivi pritet të ngjallë reagime të forta ndërkombëtare, në një kohë kur tensionet në Lindjen e Mesme mbeten të larta dhe zgjidhja politike për konfliktin izraelito-palestinez duket gjithnjë e më larg.
