Ushtria izraelite ka lëshuar një urdhër të ri për zhvendosje të detyruar për mijëra palestinezë në Gazën qendrore, duke i detyruar të lëvizin drejt jugut, në zonën bregdetare të al-Mawasit – një territor që vetë Izraeli e ka shpallur si “zonë të sigurt”, por që ka qenë në mënyrë të përsëritur cak i bombardimeve.
Të dielën, mbi qytetin e Deir el-Balah u hodhën mijëra fletëpalosje që u bënin thirrje familjeve palestineze, shumë prej të cilave janë zhvendosur nga zona të tjera dhe jetojnë në tenda, që të largohen menjëherë. Paralajmërimi u shoqërua me kërcënime për ndërhyrje ushtarake ndaj luftëtarëve të Hamasit që, sipas ushtrisë izraelite, gjenden në këtë zonë.
Në të njëjtën ditë, sulmet ajrore izraelite goditën civilë të paarmatosur që kërkonin ndihma në Gazën veriore, duke shkaktuar të paktën 73 viktima, shumica prej tyre në radhët e civilëve që prisnin ndihma humanitare.
Zëdhënësi i ushtrisë izraelite në gjuhën arabe, Avichay Adraee, shkroi në një postim në rrjetin “X” (ish-Twitter) se të gjithë banorët e Deir el-Balah duhet të largohen menjëherë në drejtim të al-Mawasit. Ai shtoi se forcat izraelite po “zgjeronin aktivitetet e tyre” përfshirë “zona ku më parë nuk kishin vepruar”.
“Askund tjetër për të shkuar”
Gazetarja e Al Jazeera-s, Hind Khoudary, raportoi nga Deir el-Balah se kjo zonë është jashtëzakonisht e mbipopulluar dhe zhvendosja me një paralajmërim kaq të shkurtër është thuajse e pamundur.
“Palestinezët po refuzojnë të largohen, duke thënë se nuk kanë ku të shkojnë. Edhe zonat e shpallura të sigurta janë objektiva të sulmeve izraelite,” raportoi ajo.
Sipas banorëve, al-Mawasi dhe zonat e tjera në perëndim të Rripit të Gazës janë mbushur përtej kapaciteteve me tenda dhe refugjatë, pa asnjë mundësi për zgjerim. “Ata kanë mbetur pa asnjë zgjidhje,” shtoi Khoudary.
Ky veprim i fundit i ushtrisë izraelite është pjesë e ofensivës së vazhdueshme në Gazë, që ka shkaktuar një krizë humanitare të përmasave të mëdha dhe ka ngritur shqetësime të thella ndërkombëtare për respektimin e të drejtave të civilëve dhe të drejtës ndërkombëtare humanitare.
