Izraeli ka njoftuar zgjerimin e operacioneve të tij ushtarake në Gaza, duke synuar të “pastrojë enklavën nga terroristët dhe infrastrukturën terroriste”, sipas Ministrit izraelit të Mbrojtjes, Israel Katz. Ai theksoi se forcat izraelite do të pushtojnë një zonë të gjerë të territorit, që më pas do të aneksohet si një “zonë e sigurisë izraelite”.
Katz konfirmoi se operacionet ushtarake tashmë kanë filluar në Rafah, një qytet në jug të Gazës, ku ushtria izraelite ka urdhëruar banorët të lënë shtëpitë e tyre dhe të lëvizin në veri. Sipas zëdhënësve të ushtrisë, operacioni ka vazhduar edhe gjatë natës, duke shkaktuar viktima. Të paktën 17 persona, përfshirë gra dhe fëmijë, kanë humbur jetën në sulmet e fundit në Gazë, raporton CNN.
Sipas të dhënave të ministrisë së Shëndetësisë palestineze, që nga rinisja e ofensivës dy javë më parë, 1,042 persona janë vrarë, ndërsa Kombet e Bashkuara kanë paralajmëruar për krizë humanitare pasi furnizimet me ushqime në Gaza po përfundojnë.
Pas bllokimit të ndihmave humanitare dhe shkeljes së armëpushimit gati dy mujor me Hamasin, Izraeli ka intensifikuar sulmet në Gazë. Ushtria izraelite ka paralajmëruar se do të mbajë një prani të përhershme në disa zona të Gazës derisa të lirohen 24 pengjet e mbetur, të cilët besohet të jenë ende gjallë.
Rezistencë dhe shqetësime për një ofensivë afatgjatë
Izraeli ka përgatitur një operacion të gjerë në Gaza për disa javë, me udhëheqjen e një shefi të ri të shtabit, gjenerallejtënant Eyal Zamir. Ky operacion mund të nënkuptojë një angazhim afatgjatë në Gaza, por mund të ndeshet me rezistencë të fortë nga publiku izraelit, shumica e të cilëve janë pro një marrëveshjeje për lirimin e pengjeve, sesa për një luftë të gjatë.
Forumi i familjeve të pengjeve izraelite ka reaguar me shqetësim ndaj njoftimit të zgjerimit të operacionit ushtarak, duke e cilësuar lajmin si “tmerrues”. Ata kanë kërkuar që Kryeministri, Ministri i Mbrojtjes dhe Shefi i Shtabit të Përgjithshëm të dalin përpara publikut dhe të shpjegojnë se si ky operacion do të ndihmojë në arritjen e objektivit të lirimit të pengjeve dhe përfundimit të luftës.
