Japonia ka hyrë në një fazë të re të politikës së saj të mbrojtjes, duke vendosur sisteme të avancuara raketore me rreze të gjatë veprimi, një zhvillim që shihet si sinjal i qartë i rritjes së tensioneve me Kina dhe rajonin përreth.
Forcat Tokësore të Vetëmbrojtjes japoneze kanë futur në përdorim dy sisteme të reja të zhvilluara në vend, të njohura si seria “Tipi 25”. Këto përfshijnë një raketë të përmirësuar sipërfaqe-anije dhe një armë moderne hipersonike.
Raketa e përditësuar, e bazuar në modelin e mëparshëm Tipi 12, ka një rreze veprimi deri në 1,000 kilometra, duke i dhënë Tokios aftësi për të goditur objektiva shumë më larg se më parë, përfshirë jo vetëm anije, por edhe baza tokësore të armikut.
Në të njëjtën kohë, Japonia ka prezantuar edhe një armë të avancuar të quajtur HVGP, një mjet rrëshqitës hipersonik që lëviz me shpejtësi ekstreme dhe ndjek trajektore të paparashikueshme, duke e bërë shumë të vështirë për sistemet aktuale të mbrojtjes ta ndalin.
Ky zhvillim shënon një kthesë të madhe strategjike për Japoninë, e cila për dekada ka mbajtur një politikë kryesisht mbrojtëse dhe është mbështetur në Shtetet e Bashkuara për sigurinë e saj.
Tani, përballë rritjes së kapaciteteve ushtarake në rajon dhe tensioneve në Azi, Tokio po kalon drejt një doktrine të re që synon goditjen e kërcënimeve në distancë, para se ato të materializohen.
Ekspertët vlerësojnë se këto sisteme jo vetëm që forcojnë mbrojtjen e Japonisë, por edhe rrisin fuqinë e saj parandaluese, duke ndryshuar balancën ushtarake në rajon. Në një klimë ku teknologjia po dikton ritmin e sigurisë globale, kjo lëvizje shihet si një mesazh i qartë: epoka e mbrojtjes pasive po mbyllet, dhe ajo e reagimit të shpejtë ka nisur.
