Barcelona ka zyrtarizuar transferimin e portierit katalanas, Joan Garsia, i cili ka nënshkruar një kontratë gjashtëvjeçare me klubin, që do të zgjasë deri më 30 qershor 2031.
Blaugranat aktivizuan klauzolën e lirimit prej 25 milionë eurosh, plus rregullimin për inflacion, për të siguruar shërbimet e portierit 24-vjeçar, i cili vjen nga Espanyol. Marrëveshja përfundimtare pritet të nënshkruhet formalitet më 16 qershor në selinë e klubit, në një ceremoni me dyer të mbyllura.
Joan Garsia nisi karrierën e tij duke ndjekur hapat e vëllait më të madh. Ai u rrit në akademitë e Manresës dhe Damm, përpara se të bashkohej me Espanyol në moshën 15-vjeçare. Gjatë periudhës së tij në ekipet e të rinjve të klubit blanquiazul, Garsia u aktivizua në përzgjedhjet e kombëtares spanjolle nga grupmosha U17 deri në U21, dhe në vitin 2024 arriti kulmin duke fituar medaljen e artë olimpike në Paris.
Sezoni 2023/24 shënoi kthesën e karrierës së tij, pasi u aktivizua si portier titullar i Espanyolit në La Liga. Ai luajti një rol kyç në ngjitjen e ekipit në elitën e futbollit spanjoll dhe në sigurimin e mbijetesës në sezonin pasardhës, duke u renditur si portieri me më shumë pritje në kampionat (146 pritje) dhe sipas statistikave të avancuara, si më i mirë në parandalimin e golave.
Në moshën 24-vjeçare, Joan Garsia përfaqëson një investim strategjik për Barcelonën, duke ofruar besueshmëri të menjëhershme dhe potencial për t’u shndërruar në një nga portierët kryesorë të nivelit evropian për të ardhmen.
