Përfaqësuesja e Lartë e Bashkimit Evropian, Kaja Kallas, ka përfunduar vizitën e saj në Serbi, duke i dërguar një mesazh të qartë autoriteteve serbe: vendi duhet të përqendrohet në reformat e nevojshme dhe të tregojë një drejtim të qartë strategjik për të avancuar në rrugën e integrimit në Bashkimin Evropian.
“Dua ta shoh Serbinë duke ecur drejt Bashkimit Evropian. Për këtë, liderët politikë duhet të bëjnë reformat e nevojshme dhe të tregojnë drejtimin e qartë strategjik. Kjo arrihet duke rikthyer besimin dhe qëndruar besnikë ndaj parimeve demokratike,” ka shkruar Kallas në një postim në X (ish-Twitter).
Pas vizitës në Serbi, Kallas pritet të mbërrijë së shpejti në Kosovë dhe më pas në Maqedoninë e Veriut. Megjithatë, detajet për takimet e saj në Kosovë mbeten të paqartë, pasi për këtë vizitë nuk ka informacione të plota në lidhje me agjendën e saj, në dallim nga vizitat në Beograd dhe Shkup, ku shërbimi Evropian i Veprimit të Jashtëm (EEAS) ka njoftuar takime të planifikuara me presidentë, kryeministra dhe ministra.
Në rastin e Kosovës, njoftimi për vizitën e Kallas thotë se ajo do të takohet me përfaqësues të partive politike dhe organizatave të shoqërisë civile, por pa dhënë më shumë detaje mbi takimet specifike.
