Projekti për rehabilitimin e kanalit strategjik Ibër Lepenc, me vlerë prej 13 milionë euro, është në fazën përfundimtare, njoftoi Ministrja e Ekonomisë, Artane Rizvanolli.
Punimet në këtë kanal prej 49 kilometrash, i cili ka rëndësi jetike për furnizimin me energji elektrike, ujë të pijshëm dhe ujitje për bujqësi, kanë arritur tashmë 90% të realizimit, pas dy vitesh punë intensive.
Ky projekt kishte nisur me një kontratë problematike të trashëguar nga e kaluara, që për vite të tëra kishte arritur vetëm 10% të zbatimit. Pas ndërprerjes dhe rishpalljes së tenderit, situata ndryshoi rrënjësisht.
“Kanali nuk është vetëm infrastrukturë – është garanci për jetë, zhvillim dhe siguri kombëtare”, u shpreh Rizvanolli, duke shtuar se përmes këtyre investimeve, do të rritet siguria ujore, do të garantohet funksionaliteti afatgjatë i kanalit dhe do të reduktohen humbjet e ujit.
Projekti i mbështetur nga Banka Botërore dhe Qeveria e Kosovës përfshin:
-
Riparimin e akuadukteve (2,586 metra),
-
Krijimin e rezervuarit bufer me kapacitet 30,000 m³,
-
Rindërtimin e kanaleve trapezoidale dhe drejtkëndore,
-
Ndërtimin e kutive shpërndarëse të ujit, rrjetave mbrojtëse, murëve mbajtës, dhe sistemeve për mbrojtjen e mjedisit.
Po ashtu, është theksuar reagimi i shpejtë i ekipit teknik për sanimin e dëmeve në kanal pas sulmit terrorist më 29 nëntor 2024.
Ministrja falënderoi Bordin dhe menaxhmentin e Ibër Lepencit, si dhe ekipin e projektit, për përkushtimin në realizimin e këtij projekti madhor që përbën një pasuri strategjike për vendin.
