Kancelari gjerman Friedrich Merz ka bërë thirrje për rritje urgjente të autonomisë evropiane, duke u kërkuar vendeve të Bashkimit Evropian të veprojnë të bashkuara dhe me vendosmëri përballë një rendi global gjithnjë e më të paqëndrueshëm.
Duke folur në pritjen vjetore të Bursës Gjermane në Eschborn, pranë Frankfurtit, Merz theksoi se Evropa ndodhet në “një nga periudhat më të mëdha të pasigurisë politike” dhe përballë një “pike kthese historike”, ku fuqitë e mëdha, sipas tij, po veprojnë gjithnjë e më shumë mbi bazën e forcës dhe jo të rregullave.
“Vetëm nëse ne evropianët veprojmë të bashkuar dhe me vendosmëri, mund të bëjmë diferencën në botë dhe të ndërtojmë një Evropë sovrane, të lirë, paqësore dhe ekonomikisht të fortë”, deklaroi Merz, duke nënvizuar se Gjermania është e gatshme të marrë një rol udhëheqës në këtë proces.
Kancelari gjerman vuri theksin në domosdoshmërinë e forcimit të mbrojtjes evropiane, rritjes së konkurrueshmërisë së ekonomisë dhe arritjes së pavarësisë teknologjike. Ai pranoi se marrëdhëniet transatlantike kanë pësuar ndryshime të dukshme, por theksoi se “nostalgjia për të kaluarën nuk është zgjidhje”.
Merz u ndal gjithashtu te nevoja për krijimin e një tregu të përbashkët evropian të kapitaleve, duke kërkuar heqjen e barrierave që pengojnë funksionimin e tij. Sipas tij, një treg i tillë do t’u mundësonte kompanive evropiane të financohen brenda BE-së dhe të mos detyrohen të listohen në bursat amerikane, duke përmendur si shembull kompaninë BioNTech, e cila u listua në NASDAQ në vitin 2019.
Ai rikujtoi se samiti i jashtëzakonshëm i Bashkimit Evropian më 12 shkurt do të fokusohet në rritjen e konkurrueshmërisë dhe uljen e burokracisë.
Në këtë kontekst, Merz deklaroi se marrëveshja tregtare e BE-së me vendet e Mercosur-it (Argjentina, Brazili, Uruguai dhe Paraguai) mund të hyjë në fuqi përkohësisht edhe para një vendimi të Gjykatës Evropiane, pavarësisht kundërshtimeve në Parlamentin Evropian. Sipas tij, marrëveshja do të zbatohet sapo të ratifikohet nga shteti i parë i Amerikës së Jugut.
