Kryetari i Skenderajt nga PDK, Sami Lushtaku, është shprehur i lumtur për vendimin që ka marrë partia e tij për të qëndruar në opozitë dhe për të mos hyrë në ndonjë marrëveshje koalicioni me Lëvizjën Vetëvendosje të Albin Kurtit.
Lushtaku tha se ky vendim ka treguar “dinjitet”.
“E falënderoj shumë kryetarin e partisë dhe Kryesinë që vërtet kanë treguar dinjitet dhe shpresoj që qytetarët dhe ata që e duan Partinë Demokratike dhe e duan Kosovën, e kanë mirëpritur këtë vendim të partisë”.
Që PDK mos me qenë në koalicion me Vetëvendosjen? – e pyeti gazetari Lushtakun.
“Absolut jo”, tha ai.
Hamza sot pas takimit që pati me Kurtin tha se qëndrimi i PDK’së është i qartë për këtë mandat: qëndron në opozitë.
“Bazuar në bisedat që kemi pasur dhe diskutimet që kemi pasur, normalisht korrekte, qëndrimi ynë është që PDK për këtë mandat është parti në opozitë dhe ne i dëshirojmë sukses zotit Kurti dhe të gjithë atyre që takohen, bisedojnë, që t’i japin vendit institucione, duke i përfshirë të gjitha institucionet”, tha Hamza më herët për gazetarët.
