Inspektorati Policor i Kosovës (IPK) ka arrestuar sot katër zyrtarë policorë, të dyshuar për veprën penale “manipulim me prova”. Arrestimi është kryer nga hetuesit e Departamentit të Hetimeve të IPK-së.
Sipas hetimeve fillestare, më 13 shtator 2025, policët e dyshuar nuk kanë proceduar një rast penal të “Shkaktimit të rrezikut të përgjithshëm” dhe dyshohet se kanë fshehur si dhe manipuluar me provat e gjetura në vendngjarje.
Me vendim të Prokurorisë Themelore në Mitrovicë, të dyshuarve u është caktuar masa e ndalimit prej 48 orësh. Paralelisht, IPK i ka rekomanduar Policisë së Kosovës – Drejtorisë Rajonale të Mitrovicës së Jugut, suspendimin e katër zyrtarëve të dyshuar, të cilët shërbenin në Stacionin Policor të Mitrovicës së Jugut.
Hetuesit e IPK-së, në koordinim me Prokurorinë, kanë paralajmëruar se do të ndërmarrin veprime të tjera hetimore me qëllim të ndriçimit të plotë të rrethanave të rastit.
