Instituti Demokratik i Kosovës (KDI) ka shprehur mirëseardhjen ndaj ftesës së presidentes Vjosa Osmani-Sadriu për takime konsultative me krerët e partive politike, të cilat do të zhvillohen më 15 maj. KDI e cilëson këtë hap si të duhur për zhbllokimin e ngërçit aktual dhe për përmbushjen e detyrimit të Presidentes për të garantuar funksionimin kushtetues të institucioneve.
Në një komunikatë për media, KDI theksoi se seancat e përsëritura të Kuvendit pa marrëveshje politike dhe pa progres të dukshëm kanë penguar formimin e institucioneve të reja. KDI kishte kërkuar një iniciativë të tillë mbi dy javë më parë, duke theksuar se kjo situatë po dëmtonte funksionimin demokratik të vendit.
Në apel të veçantë, KDI i bëri thirrje të gjitha partive politike që të marrin pjesë në takimin e thirrur nga Presidentja Osmani, duke theksuar se ky takim është një mundësi për të nxitur një dialog të domosdoshëm ndërpartiak dhe për të gjetur zgjidhje për krizën politike. KDI kërkoi që pjesëmarrja në këtë takim të jetë një angazhim serioz dhe konkret për të funksionalizuar institucionet e Kosovës.
