Kompania për Distribuimin e Energjisë Elektrike në Kosovë (KEDS) ka njoftuar se të premten, më 14 nëntor 2025, do të kryhen punime të domosdoshme për siguri të sistemit energjetik, për shkak të të cilave në disa rajone të vendit do të ketë ndërprerje të përkohshme të energjisë elektrike.
Sipas njoftimit, ndërprerjet do të prekin disa zona të Prishtinës, Pejës, Ferizajt, Gjakovës dhe Gjilanit, ku ekipet e KEDS-it do të kryejnë punime në projekte investive, pastrime të trasesë, bartje të kabllove dhe energjizime të rrjeteve të reja.
Prishtina
Në kryeqytet dhe rrethinë, punimet do të zhvillohen në disa pika si Mazgit, Fushë Kosovë dhe Podujevë, ku përkohësisht do të ndërpritet furnizimi me energji për shkak të pastrimit të trasesë dhe montimit të transformatorëve të rinj.
Ndërprerje pritet të ketë edhe në zonën e shkollës “Gjin Gazulli” dhe AUK-ut, ku po realizohet energjizimi i rrjetit të ri elektrik.
Në Fushë Kosovë, lagjet pas hekurudhës dhe fshatrat Kuzmin e Bardhi i Madh do të preken nga demontimi i rrjetit të vjetër.
Peja
Në Pejë, ndërprerje do të ketë në Nakllë, Nabërgjan, Lluga dhe Llabjan, si dhe në Radavc, Vitomiricë, Brestovik dhe Jabllanicë, për shkak të ndërrimit të përçuesve dhe bartjes së linjave në shtylla të reja.
Në Deçan, punimet investive përfshijnë zhvendosjen e shtyllave dhe inspektimin e linjës në fshatrat Baran, Berliq, Turjakë, Rashiq e Vranoc.
Ferizaj
Në këtë rajon, priten ndërprerje në zonën industriale dhe rrethinën e Ferizajt, përfshirë fshatrat Prelez, Talinoc dhe Muhoc, si dhe rrugët kryesore Driton Islami, Magjistralja Ferizaj-Prishtinë dhe Reçaku.
Punimet përfshijnë bartje kabllosh dhe energjizim të rrjeteve të reja, si dhe pastrime të trasesë në drejtim të Shtimes, Godancit dhe Raçakut.
Gjakova
Në Gjakovë, ndërprerje do të ketë në fshatrat Bistrazhin, Damjan, Dol, Fshaj, Gërqinë dhe Lipovec, për shkak të mirëmbajtjeve parandaluese dhe përmirësimit të defekteve.
Ndërkohë, në rrugën “Lekë Dukagjini”, do të zhvillohen punime për kyçjen e konsumatorëve ekzistues në rrjetin e ri elektrik.
Gjilan
Në fshatin Livoq i Epërm, do të ketë ndërprerje të energjisë elektrike nga ora 09:00 deri në 14:30, për shkak të shkarkimit të daljeve të tensionit të ulët në zonën e shkollës.
