KEDS ka njoftuar se të mërkurën, më 18 mars 2026, do të realizohen punime të domosdoshme për sigurinë dhe mirëmbajtjen e rrjetit energjetik, çka do të shkaktojë ndërprerje të përkohshme të energjisë elektrike në disa rajone të Kosovës.
Në Prishtinë, pa energji do të mbesin fshatrat Koliq, Ballaban dhe Nishevc nga ora 10:00 deri në 15:00, për shkak të mirëmbajtjes preventive dhe ndërhyrjeve pas inspektimeve me dron.
Ndërkohë në rajonin e Prizren, ndërprerjet do të prekin një numër të madh fshatrash, përfshirë Budakovën, Reçanin, Greiçecin dhe Mohlanin, gjithashtu nga ora 10:00 deri në 15:00, si pjesë e punimeve për eliminimin e defekteve në rrjet.
Në Mitrovicë, ndërprerjet do të jenë më të gjera dhe do të zgjasin nga ora 09:30 deri në 15:00, duke përfshirë zona si Tuneli i Parë, Bajgora, Stan Tërgu, Mazhiqi, Rashani dhe një sërë vendbanimesh të tjera, për shkak të energjizimit të linjave të reja dhe përmirësimeve infrastrukturore.
Edhe në Gjakovë, disa fshatra si Çifllaku, Denja dhe Polluzha do të mbeten pa rrymë nga ora 10:00 deri në 15:00, ndërsa në Gjilan ndërprerjet do të ndodhin nga ora 10:30 deri në 15:00 në zona si Kllokoti, Budrika dhe Gjylekari, për shkak të kyçjes së një trafostacioni të ri.
KEDS bën thirrje për mirëkuptim nga qytetarët, duke theksuar se këto ndërhyrje janë të nevojshme për të garantuar një furnizim më të qëndrueshëm dhe më të sigurt me energji elektrike në të ardhmen.
