Kryeministri britanik, Keir Starmer, prezantoi sot në Dhomën e Komunave progresin e bisedimeve për paqen në Ukrainë, duke theksuar rëndësinë e një marrëveshjeje “të drejtë dhe të qëndrueshme”.
Starmer njoftoi se drafti fillestar i Shteteve të Bashkuara përfshinte pika që nuk ishin të pranueshme, por gjithashtu elementë të rëndësishëm për arritjen e një paqeje të qëndrueshme. Ai shtoi se finalizimi i planit është në proces dhe qeveria britanike është “më e përkushtuar se kurrë” për ta arritur atë.
Kryeministri theksoi disa kushte kyçe për paqen: ruajtja e sovranitetit të Ukrainës, mundësia për mbrojtje e saj në të ardhmen, dhe vendimmarrja e Ukrainës mbi çështjet e saj të brendshme. Çështjet që lidhen me Evropën dhe NATO-n duhet të vendosen me konsensusin e anëtarëve të tyre.
Duke folur për Rusinë, Starmer e përshkroi si shtetin që ka nisur luftën dhe kërkoi ushtrimin e “çdo presioni të mundshëm” për të pranuar planin e paqes. Ai gjithashtu komentoi mbi humbjet ruse, duke thënë se më shumë se një milion ushtarë janë vrarë ose plagosur për shkak të “ambicieve perverse” të Vladimir Putinit.
Starmer paralajmëroi se ambiciet e Rusisë nuk kufizohen vetëm në Ukrainë dhe se vendet fqinje janë të vetëdijshme për kërcënimin që paraqet pushtimi.
