Qendra.Info – Tensionet mes Iranit dhe Izraelit po përshkallëzohen ndjeshëm, ndërsa Teherani ka akuzuar publikisht Shtetet e Bashkuara për mbështetje të drejtpërdrejtë ndaj sulmeve të ushtrisë izraelite në territorin iranian.
Zëvendësministri i Jashtëm iranian, Abbas Aragçi, deklaroi para trupit diplomatik të huaj në Teheran se vendi i tij disponon “dëshmi të forta” se bazat amerikane në rajon kanë asistuar sulmet izraelite. “Kemi prova të qarta për mbështetjen e forcave dhe bazave amerikane në rajon ndaj sulmeve të regjimit sionist”, tha ai, në një deklaratë të transmetuar nga televizioni shtetëror iranian.
Në anën tjetër, ish-presidenti amerikan Donald Trump reagoi vonë mbrëmë duke mohuar çdo përfshirje të SHBA-së në sulmet e kryera nga Izraeli kundër Iranit. “Washingtoni nuk ka qenë i përfshirë në asnjë mënyrë,” theksoi ai.
Sipas Aragçit, sulmi ndaj objekteve bërthamore iraniane nga ana e Izraelit ka “kaluar një vijë të kuqe të re” dhe përbën një përpjekje të qëllimshme për të minuar diplomacinë dhe për të bllokuar çdo përpjekje për rifillimin e bisedimeve për programin bërthamor.
Ministri iranian siguroi se vendi i tij është i gatshëm të arrijë marrëveshje që garantojnë se Irani nuk do të ndjekë ndërtimin e armëve bërthamore, por theksoi se Teherani nuk do të pranojë asnjë marrëveshje që i mohon të drejtën për zhvillimin paqësor të teknologjisë bërthamore.
Ndërkohë, Omani – i cili ka vepruar si ndërmjetës në bisedimet mes SHBA-së dhe Iranit – konfirmoi anulimin e raundit të gjashtë të negociatave që ishte planifikuar të mbahej këtë fundjavë.
Situata u tensionua më tej pas një sulmi izraelit mbi rafinerinë “Južni Pars” në jug të Iranit, për të cilën zyrtarët iranianë paralajmëruan se mund të sjellë përhapje të konfliktit në rajonin strategjik të Gjirit Persik. “Zgjerimi i luftës në Gjirin Persik do të ishte një gabim strategjik i madh dhe i qëllimshëm,” paralajmëroi Aragçi.
Irani gjithashtu kritikoi ashpër qëndrimin e vendeve perëndimore dhe të Këshillit të Sigurimit të OKB-së, duke i akuzuar për heshtje ndaj agresionit izraelit dhe për fajësim të palës iraniane, ndonëse kjo e fundit është, sipas tyre, “viktima e sulmeve”.
Qendra.Info do të vazhdojë të sjellë përditësime mbi këtë zhvillim të rrezikshëm me potencial për përshkallëzim rajonal dhe global.
