Prokuroria Themelore në Gjakovë, Departamenti për Krime të Rënda, ka njoftuar se ka paraqitur kërkesë në Gjykatën Themelore të Gjakovës për caktimin e masës së paraburgimit ndaj të pandehurit me inicialet R.E., për një periudhë 30 ditore.
Sipas Prokurorisë, ekziston dyshimi i bazuar se më datë 08.10.2025, rreth orës 06:00, R.E. ka poseduar me qëllim shitjen substanca të klasifikuara si narkotikë. Gjatë kontrollit dhe bastisjes në banesën e të pandehurit janë sekuestruar 5 kg e 43 gram substancë e dyshuar për marihuanë.
Këto veprime ngrejnë dyshimin se i pandehuri ka kryer veprën penale të blerjes, posedimit, shpërndarjes dhe shitjes së paautorizuar të narkotikëve, substancave psikotrope dhe analoge, sipas nenit 267 paragrafi 1 të Kodit Penal të Republikës së Kosovës (KPRK).
I pandehuri është ndaluar që nga data 8 tetor 2025 me vendim të Prokurorit të Shtetit dhe gjendet nën masën e ndalimit 48 orësh, në kuadër të hetimeve për këtë rast.
