Viti 2026 shënon një moment kyç për tregun e punës në Gjermani, i cili po përballet me një transformim historik. Për shkak të daljes masive në pension të gjeneratës “baby boomer”, ekonomisë më të madhe evropiane i mungojnë rreth 400 mijë punëtorë të kualifikuar çdo vit.
Sipas projeksioneve të instituteve ekonomike si IAB dhe IW Köln, mungesa e fuqisë punëtore pritet të thellohet edhe më tej gjatë vitit 2026, duke krijuar mundësi reale punësimi për punëtorët nga Ballkani Perëndimor – jo vetëm për ata me diploma universitare, por edhe për zanatçinjtë dhe profesionistët teknikë.
Ligji i ri i imigracionit për fuqi punëtore të kualifikuar (Fachkräfteinwanderungsgesetz) dhe prezantimi i “Hartës së Mundësive” e kanë lehtësuar ndjeshëm ardhjen në Gjermani, ndërsa fokusi i punëdhënësve është zhvendosur nga diplomat formale te aftësitë praktike dhe përvoja konkrete.
Zejtarët në fokus: fituesit absolutë të vitit 2026
Për shkak të tranzicionit energjetik (pompa nxehtësie, energji diellore, rinovim ndërtesash), kërkesa për zejtarë ka shpërthyer.
Profilet më të kërkuara:
-
Elektricistë
-
Instalues të ngrohjes dhe hidraulikës
-
Saldatorë
-
Inxhinierë mekatronikë
Pagat:
Zejtarët me përvojë fitojnë 3,200 – 4,200 € bruto/muaj. Me shtesa për punë në terren dhe jashtë orarit, të ardhurat neto shpesh rivalizojnë edhe pagat e inxhinierëve.
Kujdestarë dhe personel mjekësor – punë e sigurt edhe në krizë
Sektori i shëndetësisë vazhdon të vuajë nga mungesa kronike e stafit, veçanërisht në spitale dhe shtëpi pleqsh.
Pagat:
Kujdestarët e kualifikuar me diplomë të njohur (Anerkennung) fitojnë 3,000 – 3,800 € bruto, në varësi të landit. Ndërrimet e natës dhe fundjavës sjellin shtesa të konsiderueshme financiare.
Transporti dhe logjistika: mungesë alarmante shoferësh
Logjistika mbetet shtylla kryesore e ekonomisë gjermane, por mungesa e shoferëve profesionistë është serioze.
Profilet më të kërkuara:
-
Shoferë kamionësh (LKW Fahrer)
-
Shoferë autobusësh urbanë
Pagat:
Fillojnë nga 2,500 – 3,000 € bruto, ndërsa me mëditje dhe turne të gjata të ardhurat rriten ndjeshëm. Shumë kompani ofrojnë trajnim falas për Kodin 95 dhe kurse gjuhe.
Arsimi dhe edukimi: kërkesë e lartë për edukatorë
Gjermania po përballet me mungesë të madhe edukatorësh në kopshte (Erzieher), për shkak të zgjerimit të kapaciteteve të kujdesit për fëmijë.
Pagat:
Në sektorin publik, sipas TVöD, variojnë nga 3,300 – 3,900 € bruto, me siguri të lartë pune dhe përfitime sociale afatgjata.
Bruto apo Neto? Çfarë duhet ditur
Në Gjermani, paga negociohet gjithmonë në bruto. Neto varet nga:
-
klasa tatimore
-
statusi familjar
-
numri i fëmijëve
Mesatarisht:
-
beqarët marrin 60–65% të bruto-s
-
familjet me fëmijë përfitojnë më shumë
Megjithatë, me paga që arrijnë deri në 4,000 € bruto, standardi i jetesës mbetet arsyeja kryesore pse mijëra punëtorë nga Ballkani po planifikojnë të ardhmen e tyre në Gjermani gjatë vitit 2026.
