Deputetja e Lidhjes Demokratike të Kosovës, Doars Kica-Xhelili ka sqaruar se nuk është e drejtë që të ndryshohet forma e votimit nga e hapur në të fshehtë në mes të procesit.
Ajo ka insistuar se praktika parlamentare nuk e legjitimon këtë.
“Referenca e Kushtetutës në Rregulloren e Kuvendit është një kërkesë imperative, e cila bën që Rregullorja e Kuvendit të ketë fuqi normative. Ajo nuk është vetëm një akt i brendshëm, por një normë ndihmëse kushtetuese për procedurën e zgjedhjes së Kryetarit”, ka thënë deputetja e LDK-së.
“Se Rregullorja e Kuvendit përcakton standardin e mekanizmave procedural e ka konfirmuar vet Gjykata Kushtetuese pikërisht në lëndën në të cilën po thirret pushteti”, ka sqaruar ajo.
Sipas saj, më saktë, paragrafi 106 po aty, qartëson se derisa Kushtetuta shërben për krijimin e bazamentit strukturorë, Rregullorja e Punës shërben si mekanizëm procedural për implementimin e dispozitave kushtetuese – që nënkupton përcaktimin e formës së votimit.
“E Rregullorja e Punës e Kuvendit të Kosovës – e aq më shumë praktika parlamentare, nuk lejon ndryshimin arbitrar të metodës së votimit pas fillimit të procesit të votimit”, ka thënë Kica-Xhelili.
“E kur e mendon – ju po thirreni në praktikë të Gjykatës Kushtetuese a? Po silleni si hipokritë, bllokues, propagandues dhe plotësisht të papërgjegjshëm”.
