Udhëheqësi i Koresë së Veriut, Kim Jong-un, u takua me familjet e ushtarëve të vrarë gjatë operacioneve ushtarake jashtë vendit, duke u premtuar atyre një jetë të bukur dhe nderim për sakrificën e të afërmve të tyre, raportoi Agjencia Qendrore Koreane e Lajmeve (KCNA).
Ky takim vjen pas një ceremonie javën e kaluar në kryeqytetin Phenian, ku Kim bëri homazhe për ushtarët që u kthyen nga luftimet në Ukrainë. Në atë ngjarje, udhëheqësi i Koresë së Veriut u pa duke qarë dhe duke vendosur çmime shtetërore pas vdekjes mbi trupat e ushtarëve.
Sipas deklaratës së KCNA-së, Kim shprehu ngushëllime të thella për familjet e pikëlluara:
“Lajmi për vdekjen e fëmijëve dhe burrave tuaj të dashur duhet t’ju ketë ardhur si një tronditje e madhe. Partia dhe qeveria jonë do t’u sjellin gjithë lavdinë heronjve të nderuar dhe prindërve të tyre që i rritën ata si burra të admirueshëm. Ne do të bëjmë gjithçka për t’ju siguruar një jetë të bukur në vendin e mbrojtur me koston e jetës së martirëve.”
Në ceremoninë e mbajtur të premten në Shtëpinë Mokran, një vend i njohur për takime të nivelit të lartë, Kim paraqiti familjeve fotot e ushtarëve të vrarë. Numri i viktimave mbetet i paqartë, megjithatë, raportimet nga Shtetet e Bashkuara, Koreja e Jugut dhe Ukraina sugjerojnë se midis 10,000 dhe 12,000 ushtarë të Koresë së Veriut janë dërguar në Rusi në tetorin e kaluar për të mbështetur luftën kundër Ukrainës.
Në mars, Pheniani kishte dërguar mbi 3,000 personel të tjerë në Rusi, sipas një deklarate të ushtrisë së Koresë së Jugut. Agjencia e spiunazhit e Koresë së Jugut raportoi në prill se rreth 4,700 ushtarë ishin vrarë ose plagosur gjatë përkrahjes së forcave ruse.
Presidenti rus Vladimir Putin më vonë falënderoi Korenë e Veriut për ndihmën dhe premtoi të mos harrojë sakrificat e ushtarëve të saj. Sipas udhëheqësve, vendosja e trupave koreano-veriore u krye në përputhje me traktatin historik të mbrojtjes të vitit 2024, i cili kërkon që të dyja palët të japin ndihmë në rast sulmi ndaj palës tjetër.
