Kina dhe Rusia kanë nisur stërvitjen e përbashkët ushtarake “Deti-2025” në ujërat pranë portit rus të Vladivostokut, në Detin e Japonisë. Kjo stërvitje treditore, e cila filloi këtë fundjavë, është pjesë e përpjekjeve të dy shteteve për të forcuar partneritetin strategjik dhe për të kundërpeshuar ndikimin global të udhëhequr nga Shtetet e Bashkuara.
Sipas një deklarate të Ministrisë së Mbrojtjes Kombëtare të Kinës, gjatë stërvitjes do të zhvillohen operacione të shpëtimit të nëndetëseve, manovra të përbashkëta anti-nëndetëse, mbrojtje ajrore dhe anti-raketore, si dhe simulime të luftimeve detare. Në stërvitje po marrin pjesë katër anije luftarake kineze, përfshirë shkatërruesit me raketa të drejtuara “Shaoxing” dhe “Urumqi”, si dhe një numër anijesh nga Flota Ruse e Paqësorit.
Pas përfundimit të manovrave në ujërat e Detit të Japonisë, të dyja palët do të realizojnë patrullime të përbashkëta në pjesë të tjera të Paqësorit.
Kina dhe Rusia kanë zhvilluar stërvitje të përbashkëta detare çdo vit që nga viti 2012 nën emërtimin “Deti i Përbashkët”. Vjet, manovrat u zhvilluan në afërsi të bregdetit jugor të Kinës.
Ndërkohë, Japonia ka shprehur shqetësim për intensifikimin e bashkëpunimit ushtarak midis Moskës dhe Pekinit. Në raportin e saj vjetor të sigurisë, Ministria Japoneze e Mbrojtjes ka paralajmëruar se ky zhvillim paraqet rreziqe në rritje për stabilitetin rajonal.
Përkundër këtyre shqetësimeve, autoritetet ushtarake ruse kanë sqaruar se manovrat kanë karakter mbrojtës dhe nuk janë të orientuara kundër asnjë shteti të tretë. Në të njëjtën linjë, Ministria e Mbrojtjes e Kinës ka theksuar se qëllimi kryesor i stërvitjes është “thellimi i partneritetit strategjik gjithëpërfshirës” mes dy vendeve.
Kjo stërvitje vjen në një periudhë të tensionuar ndërkombëtare, ku të dy vendet po kërkojnë të forcojnë aleancën e tyre në përgjigje të presioneve perëndimore dhe zhvillimeve gjeopolitike në Azi dhe më gjerë.
