Në prag të 18-vjetorit të Pavarësisë së Kosovës, komandanti i Forca e Sigurisë së Kosovës, gjenerallejtënant Bashkim Jashari, ka pritur në takim zëvendësadjutantin e Garda Kombëtare e Ajovës, gjeneral brigade William McClintock, së bashku me stafin e tij.
Gjatë takimit, gjeneral Jashari falënderoi homologun amerikan për mbështetjen e vazhdueshme në ngritjen dhe zhvillimin e kapaciteteve të FSK-së, duke e cilësuar partneritetin me Gardën Kombëtare të Ajovës si një shtyllë kyçe në procesin e modernizimit dhe profesionalizimit të forcës.
Ai prezantoi para delegacionit amerikan zhvillimet e fundit në FSK, rolin e saj në garantimin e sigurisë në vend si dhe kontributin në stabilitetin rajonal.
Nga ana e tij, gjeneral McClintock vlerësoi lidershipin e Jasharit dhe arritjet e FSK-së ndër vite, duke uruar njëkohësisht popullin e Kosovës për përvjetorin e pavarësisë.
Të dy gjeneralët theksuan progresin e arritur në ngritjen dhe modernizimin e kapaciteteve operacionale, si dhe nivelin e lartë të ndërveprueshmërisë së trupave në aktivitetet e përbashkëta, veçanërisht gjatë trajnimeve përgatitore për dislokim në Qendrën e Gatishmërisë së Trajnimit të Përbashkët (JRTC) në SHBA.
Me këtë rast, gjenerallejtënant Jashari dekoroi gjeneralin McClintock me Medaljen për Shërbim Vetëmohues, në shenjë mirënjohjeje për mbështetjen dhe përkrahjen e tij të vazhdueshme në avancimin e programit të partneritetit ndërmjet FSK-së dhe Gardës Kombëtare të Ajovës.
Në përmbyllje, palët riafirmuan se thellimi i bashkëpunimit dypalësh mbetet prioritet strategjik, ndërsa forcimi i kapaciteteve mbrojtëse të Republikës së Kosovës konsiderohet element thelbësor për një mjedis të qëndrueshëm sigurie në rajon.
