Komisioni Qendror i Zgjedhjeve ka finalizuar dhe certifikuar listën votuese brenda dhe jashtë vendit për zgjedhjet e parakohshme parlamentare që mbahen më 28 dhjetor 2025.
Zëdhënësi i KQZ-së, Valmir Elezi, konfirmoi se numri i përgjithshëm i shtetasve të Kosovës me të drejtë vote është 2,076,290.
“Sipas Listës Votuese, 1,999,205 qytetarë votojnë në vendvotimet brenda Kosovës, ndërsa 77,085 janë regjistruar për të votuar jashtë vendit. Kjo listë ka 7,192 votues më shumë krahasuar me zgjedhjet lokale të 12 tetorit 2025”, tha Elezi.
Procesi brenda vendit do të zhvillohet në 948 qendra votimi, me gjithsej 2,614 vendvotime. Prej tyre, 910 qendra përfshijnë 2,557 vendvotime të rregullta, ndërsa 38 qendra, nga një në secilën komunë, do të kenë 57 vendvotime të dedikuara për votimin me kusht.
