Kongresi i Shteteve të Bashkuara ka ngritur shqetësime serioze lidhur me sulmet ajrore të Presidentit Donald Trump në Detin e Karaibeve, të cilat kanë në shënjestër anije të dyshuara për kontrabandë droge nga Venezuela. Ligjvënësit po e cilësojnë këtë operacion si një shkelje të mundshme të Rezolutës së Fuqive të Luftës të vitit 1973, e cila kërkon që çdo veprim ushtarak që zgjat më shumë se 60 ditë të miratohet nga Kongresi.
Sipas dokumenteve të publikuara, Departamenti Amerikan i Drejtësisë i ka informuar ligjvënësit se presidenti “nuk është i detyruar të kërkojë miratim”, duke argumentuar se sulmet nuk përbëjnë “armiqësi të drejtpërdrejtë” sipas përkufizimit të ligjit.
Shefi i Zyrës Ligjore në Departamentin e Drejtësisë, Elliot Gaiser, tha se operacionet e Trump “nuk arrijnë nivelin e armiqësive të mbuluara nga ligji”, pasi ato kryhen në distanca të mëdha dhe pa rrezikuar jetën e trupave amerikane. Sipas një zyrtari të lartë të Shtëpisë së Bardhë, sulmet po zhvillohen me dronë të lëshuar nga anije luftarake që patrullojnë ujërat ndërkombëtare, duke eliminuar rrezikun për personelin ushtarak amerikan.
Megjithatë, raportet zyrtare tregojnë se të paktën 62 persona janë vrarë në 14 sulme ajrore ndaj anijeve të dyshuara për trafik droge në Detin e Karaibeve dhe në Paqësorin Lindor.
Administrata e Trump e ka përshkruar situatën si “konflikt të armatosur formal, por jo armiqësi” – një justifikim që sipas ekspertëve kujton precedentët e vendosur nga ish-presidenti Barack Obama gjatë ndërhyrjes së NATO-s në Libi në vitin 2011. Edhe atëherë, Shtëpia e Bardhë e Obamës argumentoi se sulmet ajrore nuk kërkonin miratimin e Kongresit, pasi trupat amerikane nuk ishin të përfshira në luftime tokësore.
Rezoluta e Fuqive të Luftës parashikon se një president duhet ta ndërpresë çdo operacion ushtarak pas 60 ditësh nëse nuk merr miratim nga Kongresi, duke e bërë afatin e Trump për autorizim të skadojë të hënën. Megjithatë, definicioni ligjor i termit “armiqësi” ka mbetur i paqartë për dekada, çka ka lejuar presidentët amerikanë ta interpretojnë në mënyrë fleksibile për të anashkaluar Kongresin.
Ndryshe nga Obama, sulmet e Trump nuk janë pjesë e ndonjë koalicioni ndërkombëtar apo të mbështetura nga OKB-ja, çka, sipas analistëve ligjorë, i mungon çdo bazë ligjore ndërkombëtare. Kritikët thonë se ky operacion në Karaibe është një veprim i njëanshëm që mund të hapë precedent të rrezikshëm për përdorimin e forcës pa mbikëqyrje institucionale.
Në një klimë politike tashmë të tensionuar, përplasja mes Kongresit dhe Shtëpisë së Bardhë pritet të thellohet, ndërsa Trump refuzon të kërkojë miratimin ligjor për operacionet që ai i quan “luftë kundër karteleve të drogës”.
