Deputetët e Kuvendit të Kosovës pritet të bëjnë sot përpjekjen e radhës për konstituimin e institucionit, me seancën e thirrur për 26 gusht në orën 11:00.
Deri më tani, asnjëri nga kandidatët e propozuar nga Lëvizja Vetëvendosje (VV) për postin e kryeparlamentarit nuk ka arritur të sigurojë shumicën e nevojshme të votave.
Në mbledhjen e së dielës, më 24 gusht, VV-ja propozoi tre kandidatë: Hekuran Muratin, Arbërie Nagavcin dhe Dimal Bashën. Murati dhe Nagavci siguruan nga 55 vota secili, ndërsa Basha arriti të marrë 57 vota, duke përfshirë edhe përkrahjen e deputetëve Bekë Berisha (AAK) dhe Arben Gashi (LDK). Deputetët e PDK-së abstenuan nga votimi.
Seanca konstituive e Kuvendit ka nisur më 15 prill, por pas dhjetëra vazhdimeve deri më 26 korrik, deputetët nuk kanë arritur ta finalizojnë procesin me zgjedhjen e kryetarit dhe nënkryetarëve.
Në aktgjykimin e dytë të publikuar më 19 gusht, Gjykata Kushtetuese ka përcaktuar se Kuvendi duhet të përmbyllë procesin e konstituimit brenda 30 ditësh. Po ashtu, Kushtetuesja ka theksuar se votimi për kryeparlamentarin duhet të bëhet me votë të hapur dhe se i njëjti kandidat nuk mund të propozohet më shumë se tri herë.
Deputetët e pranishëm janë të obliguar të shprehin vullnetin e tyre përmes votës: pro, kundër ose abstenim.
