Një rast i kontrabandës me barna nga Serbia është parandaluar të martën në fshatin Novosellë nga patrulla policore kufitare e Stacionit Policor për Mbikëqyrje Kufitare (SPMK) – Muçivërcë, e cila operon në kuadër të Drejtorisë Rajonale për Policinë Kufitare Lindje (DRPK-Lindje).
Sipas njoftimit zyrtar, rreth orës 13:25 është ndaluar për kontroll një automjet me targa të Serbisë, i cili kishte hyrë në territorin e Republikës së Kosovës nga drejtimi i Serbisë. Gjatë kontrollit në bagazhin e automjetit, policia ka zbuluar sasi të konsiderueshme barnash të llojeve të ndryshme, të dyshuara për kontrabandë.
Menjëherë është njoftuar prokurorja kujdestare nga Prokuroria Themelore në Gjilan, e cila ka urdhëruar që rasti të trajtohet si “Kontrabandë me mallra”. Barnat janë sekuestruar përkohësisht dhe janë dorëzuar për ruajtje në Doganën e Kosovës, ndërsa i dyshuari dhe automjeti janë liruar në procedurë të rregullt.
Policia e Kosovës thekson se mbetet e përkushtuar në parandalimin dhe luftimin e aktiviteteve të paligjshme ndërkufitare, në bashkëpunim të ngushtë me institucionet e tjera përgjegjëse.
