Në 18-vjetorin e Pavarësisë së Kosovës, Sekretari Amerikan i Shtetit, Marco Rubio, ka përcjellë një mesazh urimi në emër të Shteteve të Bashkuara të Amerikës, duke rikonfirmuar mbështetjen për shtetin e Kosovës.
Në deklaratën e publikuar nga Departamenti i Shtetit i SHBA-së, Rubio thekson se “Shtetet e Bashkuara mbeten të palëkundura në mbështetjen e tyre për sovranitetin dhe integritetin territorial të Kosovës”, duke shtuar se Uashingtoni pret të zgjerojë lidhjet ekonomike me Prishtinën për të rritur prosperitetin e të dy vendeve.
Ai vlerësoi gjithashtu rolin e Kosovës në mbështetje të përpjekjeve amerikane për përballimin e sfidave globale, si dhe mirëpriti udhëheqjen e saj si anëtare themeluese e Bordit të Paqes.
“Ndërsa Kosova shënon këtë përvjetor të rëndësishëm, mezi presim një bashkëpunim edhe më të fortë në vitet në vijim. Shtetet e Bashkuara qëndrojnë me Kosovën ndërsa ajo vazhdon të ndërtojë një të ardhme të sigurt dhe të begatë”, thuhet në fund të mesazhit.
Mesazhi i Rubios vjen në një ditë simbolike për Kosovën, e cila më 17 shkurt shënon 18 vjet nga shpallja e pavarësisë.
