Ministri në detyrë i Mbrojtjes, Ejup Maqedonci, ka bërë të ditur se Kosova ka përmbyllur të gjitha procedurat zyrtare për blerjen e sistemeve raketore anti-tank të llojit Javelin dhe aktualisht ndodhet në fazën e ekzekutimit të pagesave.
Në një intervistë për emisionin Magazina në Radio Dukagjini, Maqedonci theksoi se Kosova është në komunikim të vazhdueshëm me partnerët ndërkombëtarë për të përshpejtuar procesin e dërgesës, përkundër kërkesave të shtuara globale për këto sisteme ushtarake.
“Aktualisht jemi duke i ekzekutuar këstet e pagesave. Të gjitha procedurat janë kaluar. Jemi në fazën e ekzekutimit dhe pritjes së ardhjes së sistemeve Javelin. Po insistojmë që të kemi një sasi deri në fund të vitit, ndonëse është e vështirë për shkak të kërkesave të mëdha në tregun ndërkombëtar të armatimit,” u shpreh Maqedonci.
Ai nënvizoi se, edhe pse Forca e Sigurisë së Kosovës tashmë posedon sisteme të ngjashme raketore anti-tank, blerja e Javelin-it paraqet një avancim të rëndësishëm për kapacitetet mbrojtëse të vendit.
“Kosova nuk është pa sisteme anti-tank – ne kemi tashmë disa në FSK. Por Javelin njihet për efikasitetin e tij të lartë dhe është ndër sistemet më të avancuara të kohës,” theksoi ministri në detyrë.
Sipas tij, objektivi i Ministrisë së Mbrojtjes është që një pjesë e këtyre sistemeve të arrijnë në Kosovë brenda këtij viti, në kuadër të përforcimit të kapaciteteve mbrojtëse dhe modernizimit të ushtrisë.
