Kosova ka pësuar një disfatë të rëndë në ndeshjen hapëse të kualifikueseve për Botërorin 2026, duke u mundur nga Zvicra me rezultat 4-0 në Bazel. Përveç rezultatit të lartë, paraqitja e “Dardanëve” la shumë për të dëshiruar, pasi vendasit dominuan nga fillimi deri në fund.
Zvicra kaloi në epërsi që në minutën e 22-të me golin e Akanzhit, ndërsa vetëm pak minuta më vonë Embolo dyfishoi shifrat. Vidmer shënoi të tretin në minutën e 39-të, ndërsa Embolo realizoi edhe një gol tjetër para pushimit, duke mbyllur pjesën e parë me rezultatin 4-0.
Në pjesën e dytë, ritmi i lojës ra ndjeshëm, me Zvicrën që mbajti kontrollin e ndeshjes dhe Kosovën që nuk arriti të gjejë as golin e nderit, përkundër disa tentativave sporadike. Përballja u zhvillua përpara një numri të madh tifozësh shqiptarë që kishin udhëtuar për të mbështetur skuadrën, por zhgënjimi në fund ishte i madh.
Rezultati përfundimtar:
Zvicër – Kosovë 4-0
⚽ 22′ Akanzhi, 25′ & 45′ Embolo, 39′ Vidmer
Ndeshja e radhës për Kosovën në kualifikueset e Botërorit pritet të jetë një tjetër test i vështirë, ku skuadra e trajnerit duhet të tregojë reagim pas këtij starti të dobët.
