Agjencia e Menaxhimit Emergjent (AME) ka raportuar se nga ora 08:00 deri në 14:00 të ditës së sotme janë regjistruar gjithsej 23 vatra zjarri në mbarë vendin. Nga to, 11 mbeten ende aktive ndërsa 12 janë lokalizuar.
Sipas AME-së, situata po menaxhohet në koordinim të plotë me Njësitë Profesionale të Zjarrfikjes dhe Shpëtimit, Qendrat Operative 112 dhe Qendrën Operative të Agjencisë. Institucionet përgjegjëse janë në gatishmëri të lartë për t’iu përgjigjur çdo rreziku.
Autoritetet u bëjnë thirrje qytetarëve të tregojnë kujdes të shtuar, të shmangin çdo veprim që mund të shkaktojë zjarr dhe të raportojnë menjëherë çdo vatër në numrat emergjentë 112, 193 dhe 192.
AME ka shprehur mirënjohje për zjarrfikësit që po punojnë pa ndërprerë në terren, Policinë e Kosovës për mbështetje, si dhe qytetarët për bashkëpunimin.
