E ngarkuara me punë në Ambasadën e Shteteve të Bashkuara në Prishtinë, Anu Prattipati, ka falënderuar publikisht Qeverinë e Kosovës për vendimin e saj për të pranuar shtetas të vendeve të treta që largohen nga SHBA-ja.
Në një postim në platformën X (ish-Twitter), diplomatja amerikane e quajti këtë veprim si një dëshmi e fortë e partneritetit midis dy vendeve.
“Faleminderit partnerit tonë, Kosovës – vendit të parë në Evropë që njoftoi pranimin e shtetasve të vendeve të treta të larguar nga Shtetet e Bashkuara,” – shkroi Prattipati.
Ajo theksoi se sigurimi i kufijve është një prioritet kyç i Administratës Trump, duke shtuar se mbështetja e Kosovës në këtë drejtim është shumë e çmuar.
“Unë vlerësoj shumë si Qeverinë, ashtu edhe popullin e Kosovës për partneritetin e tyre,” – deklaroi ajo.
Konteksti i vendimit
Ky zhvillim vjen në kuadër të politikave të migracionit të Administratës së Presidentit Donald Trump, që synojnë zhvendosjen dhe përpunimin e kërkesave për azil jashtë territorit amerikan. Kosova është vendi i parë në Evropë që ka konfirmuar pjesëmarrjen në këtë nismë, duke rritur rolin e saj si partnere strategjike e SHBA-së në rajon.
