KOSTT ka njoftuar se është detyruar të aplikojë kufizime të ngarkesës në sistemin elektroenergjetik, për të ruajtur stabilitetin dhe sigurinë e rrjetit, si pasojë e mungesës së nominimeve të mjaftueshme të energjisë elektrike nga KESCO.
Sipas njoftimit zyrtar, gjatë datave 13 dhe 14 janar 2026, Zona e Kontrollit e KOSTT-it po operon me jo-balança të mëdha dhe të vazhdueshme, të cilat në periudha të caktuara tejkalojnë mbi 200 megavat. Këto devijime mes energjisë së nominuar dhe konsumit real kanë krijuar presion serioz mbi sistemin vendor dhe atë ndërkonektiv evropian.
KOSTT thekson se ka ndërmarrë të gjitha masat e nevojshme teknike për stabilizimin e sistemit, përfshirë aktivizimin e shërbimeve ndihmëse të balancimit dhe organizimin e ankandeve brendaditore. Megjithatë, për shkak të diferencës jashtëzakonisht të madhe mes furnizimit të planifikuar dhe konsumit real, këto masa nuk kanë qenë të mjaftueshme për eliminimin e jo-balançave.
Sipas operatorit të sistemit, kjo situatë po ndikon negativisht në rrjetin ndërkonektiv evropian dhe po rrit ndjeshëm rrezikun për stabilitetin e sistemit elektroenergjetik, duke e ekspozuar Kosovën ndaj masave ndëshkuese dhe duke rrezikuar edhe Marrëveshjen e Kyçjes me ENTSO-E.
Në këto rrethana, KOSTT ka bërë të ditur se është i detyruar, në përputhje me përgjegjësitë ligjore dhe operative, të aplikojë reduktime të energjisë sipas nevojës, me qëllim mbrojtjen e integritetit të sistemit dhe furnizimit afatgjatë.
Nga KOSTT theksojnë se me përmirësimin e situatës dhe stabilizimin e balancimit të energjisë, do të ndërmerren menjëherë veprimet e nevojshme për rikthimin e funksionimit normal të sistemit.
