Komisioni Qendror i Zgjedhjeve (KQZ) ka përfunduar shpërndarjen e materialit zgjedhor për zgjedhjet që do të mbahen më 12 tetor, duke përfshirë edhe fletëvotimet që do të përdoren gjatë procesit të votimit.
Zëdhënësi i KQZ-së, Valmir Elezi, konfirmoi se materiali është dërguar në të gjitha komunat dhe është vendosur në Qendrat Komunale të Numërimit. Nga këto qendra, materialet do të shpërndahen në Qendrat e Votimit të dielën në mëngjes, përpara fillimit të procesit zgjedhor.
“Sipas planifikimeve, Komisioni Qendror i Zgjedhjeve ka shpërndarë materialin zgjedhor, ku bëjnë pjesë edhe fletëvotimet, të cilat do të përdoren në procesin e votimit më 12 tetor. Këto materiale vendosen në Qendrat Komunale të Numërimit dhe nga aty, të dielën në mëngjes, do të shpërndahen në Qendrat e Votimit”, deklaroi Elezi.
Ai bëri të ditur se për raundin e parë të zgjedhjeve për Kryetarë të Komunave dhe për Kuvendet Komunale janë shtypur mbi 3.6 milionë fletëvotime – nga 1.8 milionë për secilin lloj zgjedhjesh.
Elezi theksoi se ky numër përfshin të gjitha format e votimit: votimin në vendvotimet e rregullta, votimin me kusht, votimin për personat me nevoja të veçanta, votimin me postë dhe fletëvotimet rezervë.
