Komisioni Qendror i Zgjedhjeve ka përmbyllur numërimin e fletëvotimeve që i takojnë votimit me kusht dhe votimit të personave me nevoja të veçanta, ka bërë të ditur zëdhënësi i Komisioni Qendror i Zgjedhjeve, Valmir Elezi.
Sipas Elezit, të martën mbrëma, më 6 janar, në Qendrën e Numërimit dhe Rezultateve janë numëruar fletëvotimet e 57 vendvotimeve ku më 28 dhjetor ishte mundësuar votimi me kusht, si dhe 37 kuti votimi që përfshinin fletëvotimet e personave me nevoja të veçanta, të cilët kishin votuar përmes ekipeve mobile në ditën e zgjedhjeve.
Ndërkohë, derisa numërimi i këtyre dy kategorive ishte drejt përfundimit, KQZ ka nisur edhe numërimin e pjesës së dytë të fletëvotimeve që i takojnë votimit jashtë Kosovës, respektivisht votimit përmes postës. Ky proces po vazhdon edhe gjatë ditës së mërkurë.
“Numërimi do të përfshijë fletëvotimet nga votimi përmes postës të tërhequra më 2 dhe 5 janar 2026 nga kutitë postare jashtë Kosovës”, ka deklaruar Elezi.
Sipas njoftimit zyrtar, më 2 janar janë tërhequr 8,180 pako me fletëvotime nga kutitë postare në Pragë, Londër, Paris, Zagreb, Stokholm, Stamboll, New York, Kanbera dhe Kopenhagë. Ndërsa më 5 janar, nga 13 kuti postare në qytete si Tirana, Berlini, Vjena, Berna, Brukseli, Haga, Podgorica, Oslo, Shkupi, Otava, Lubjana, Roma dhe Prishtina, janë tërhequr edhe 11,867 pako të tjera, pjesa më e madhe e të cilave tashmë janë sjellë në Kosovë.
KQZ ka rikujtuar se gjatë periudhës 3–5 janar 2026, në Qendrën e Numërimit dhe Rezultateve ishin numëruar edhe fletëvotimet e para të votimit me postë, të cilat ishin pjesë e mbi 28 mijë pakove të tërhequra para ndërrimit të viteve.
Procesi i numërimit pritet të vazhdojë edhe në ditët në vijim, deri në përmbylljen e plotë të të gjitha kategorive të votimit.
