Komisioni Qendror i Zgjedhjeve ka bërë të ditur se procesi i rinumërimit të fletëvotimeve në Qendrën e Numërimit dhe Rezultateve (QNR) po shkon drejt përfundimit.
Sipas njoftimit të KQZ-së, deri më 30 janar 2026, ora 10:00, janë rinumëruar rreth 95% e vendvotimeve, përkatësisht 2,414 nga gjithsej 2,557 vendvotime të përfshira në vendimin për rinumërim. Procesi ka nisur më 13 janar 2026, në ora 18:00.
Rinumërimi po vazhdon ende në Prishtinë, Podujevë, Suharekë dhe Shtërpcë, ndërsa KQZ thekson se rezultatet përditësohen pas numërimit të çdo vendvotimi në platformën zyrtare të rezultateve, në seksionin QNR > Rinumërim.
KQZ ka ritheksuar se procesi po zhvillohet sipas procedurave ligjore dhe me transparencë të plotë, ndërsa pritet që rinumërimi të përmbyllet shumë shpejt.
