Zëdhënësi i Kremlinit, Dmitry Peskov, ka hedhur poshtë raportet se Ministri i Jashtëm rus, Sergei Lavrov, ka humbur mbështetjen e Presidentit Vladimir Putin, duke i quajtur ato “të pabazuara” dhe “të shkëputura nga realiteti”.
Kremlini: Lavrov vazhdon të gëzojë besimin e plotë të Putinit
Në konferencën e përditshme për shtyp, Peskov tha se Lavrov vazhdon të kryejë detyrat e tij si ministër i Jashtëm, duke shtuar se çdo raport për tensione në nivelet e larta të qeverisë “nuk ka asnjë bazë reale”.
Këto deklarata vijnë pas artikujve të Kommersant dhe The Moscow Times, të cilat raportuan se Putini ishte “jashtëzakonisht i pakënaqur” me Lavrovin për mungesën e përgatitjes në takimin me Donald Trumpin në Budapest.
Sipas burimeve të këtyre mediave, Lavrov nuk mori pjesë në mbledhjen e fundit të Këshillit të Sigurisë Ruse, ku Putini urdhëroi hartimin e një raporti për testet bërthamore në rast të vazhdimit të testimeve amerikane.
Lavrov, anëtar i përhershëm i Këshillit, u zëvendësua edhe në krye të delegacionit rus në samitin e G20-ës, çka u interpretua nga disa analistë si sinjal i ftohjes së raporteve me Kremlinin.
Kremlini: “Të drejtat e Lukoil duhet të respektohen”
Në të njëjtën konferencë, Peskov komentoi edhe tërheqjen e kompanisë zvicerane të energjisë Gunvor nga marrëveshja për blerjen e aseteve ndërkombëtare të Lukoil, pas presionit nga Departamenti i Thesarit i SHBA-së, i cili e cilësoi marrëveshjen si “maskim të ndikimit rus”.
Peskov tha se sanksionet amerikane janë të paligjshme dhe kërkoi që “interesat legjitime të kompanive ruse, përfshirë Lukoil-in, të respektohen në tregtinë ndërkombëtare”.
“Ne besojmë se të gjitha interesat legjitime të një kompanie të madhe ndërkombëtare, përfshirë një kompani ruse si Lukoil, duhet të mbrohen dhe të respektohen,” tha ai.
Pas sanksioneve të reja amerikane ndaj Lukoil dhe Rosneft, kompania është detyruar të shesë asetet e saj jashtë Rusisë, përfshirë ato në Irak, Finlandë, Zvicër dhe në disa ish-republika sovjetike si Kazakistan, Uzbekistan dhe Azerbajxhan.
Kremlini mbron të drejtën e Koresë së Veriut për “siguri kombëtare”
Në fund të deklaratave të tij, Peskov reagoi edhe ndaj testit të fundit raketor të Koresë së Veriut, e cila lëshoi një raketë balistike në Detin e Japonisë.
Ai tha se Moska e respekton “të drejtën legjitime” të Phenianit për të siguruar mbrojtjen e vet.
“Ne respektojmë të drejtën legjitime të miqve tanë në Republikën Popullore Demokratike të Koresë për të marrë masa që garantojnë sigurinë e tyre,” tha Peskov.
