Kryetari i Komunës së Prishtinës, Përparim Rama, ka mbledhur sot kryetarët e komunave të rajonit të Prishtinës për të diskutuar mbi situatën alarmante me mbeturina dhe gjendjen e rënduar në ndërmarrjen publike “Pastrimi”.
Gjatë takimit, Rama ka ngritur shqetësimin për gjendjen aktuale të ndërmarrjes, duke theksuar se problemet janë rezultat i “keqmenaxhimit të vazhdueshëm dhe mungesës së përgjegjshmërisë së menaxhmentit”. Sipas tij, kriza ka prekur drejtpërdrejt funksionimin e shërbimeve të pastrimit dhe mirëqenien e punëtorëve.
Për të përballuar këtë situatë, Rama ka bërë të ditur se komunat e përfshira në këtë ndërmarrje do të forcojnë bashkëpunimin ndërkomunal dhe do të ndihmojnë njëra-tjetrën sipas nevojave që paraqiten.
“Komuna e Prishtinës, në koordinim me komunat tjera aksionare, do të ndërmarrë hapa konkretë për stabilizimin e situatës në ‘Pastrimi’, me qëllim që të mbrohet mirëqenia e punëtorëve, pagat dhe vendet e tyre të punës, si dhe të rikthehet funksionimi normal i ndërmarrjes,” ka deklaruar Rama.
Ky takim vjen në një kohë kur shumë zona të kryeqytetit dhe komunave përreth po përballen me probleme serioze në menaxhimin e mbeturinave, duke rritur nevojën për veprim të shpejtë dhe të koordinuar.
