Deputetët e Kuvendit të Kosovës do të mblidhen sot për të 19-tën herë radhazi në përpjekje për konstituimin e institucionit ligjvënës, ndërkohë që bllokada politike vazhdon për shkak të mosmarrëveshjeve ndërpartiake lidhur me pozitën e kryetarit të Kuvendit.
Lëvizja Vetëvendosje vazhdon të insistojë në kandidaturën e Albulena Haxhiut për kryeparlamentare, pavarësisht kundërshtimeve të hapura nga partitë opozitare PDK, LDK dhe AAK, të cilat e konsiderojnë të papranueshme emërimin e saj në këtë post.
Përpjekjet për të zhbllokuar situatën përmes krijimit të një Komisioni që do të mundësonte votimin e fshehtë janë penguar nga mungesa e kuorumit në seancat e fundit. Kryesuesi i përkohshëm i Kuvendit, Avni Dehari, ka propozuar disa herë ngritjen e këtij komisioni, por iniciativa nuk ka gjetur mbështetje të mjaftueshme në sallë.
Kosovarët votuan më 9 shkurt të këtij viti, por më shumë se tre muaj pas zgjedhjeve, institucionet e reja vazhdojnë të mbeten të pakonstituara, duke thelluar krizën institucionale dhe duke rritur frustrimin në opinionin publik.
Përderisa partitë politike nuk po lëvizin nga pozicionet e tyre, zgjidhja e ngërçit mbetet ende larg, ndërsa vendi përballet me pasiguri politike dhe institucionale.
