Parlamenti Evropian ka hyrë në një përplasje të re me Komisionin Evropian, duke kërcënuar se do të refuzojë elementët kryesorë të propozimit të ardhshëm shtatëvjeçar të buxhetit të BE-së, me vlerë 1.8 trilionë euro.
Dy grupet më të mëdha politike – Partia Popullore Evropiane (PPE) dhe Socialistët & Demokratët – po i kërkojnë Komisionit të tërheqë një pjesë thelbësore të planit të prezantuar në korrik.
Ky tension vjen pas muajsh të tërë mosmarrëveshjesh mes presidentes së Komisionit, Ursula von der Leyen, dhe ligjvënësve evropianë. Ajo tashmë i ka mbijetuar një mocioni mosbesimi në korrik dhe javën e ardhshme pritet të përballet me dy të tjera, të cilat besohet se do t’i kalojë.
Sipas PPE-së dhe Socialistëve, plani i Komisionit për të bashkuar fondet bujqësore dhe pagesat rajonale në një fond të vetëm të menaxhuar nga qeveritë kombëtare do të dëmtonte fermerët dhe do të fragmentonte tregun bujqësor të BE-së. PPE, që ka bazë të fortë tek fermerët, ka konfirmuar se po shqyrton hedhjen poshtë të propozimit. Nga ana tjetër, socialistët argumentojnë se buxheti nuk parashikon mjaftueshëm fonde për projekte sociale.
Komisioni Evropian e ka hedhur poshtë kritikat, duke insistuar se fondet nuk do të shkurtohen, por tensionet në rritje rrezikojnë të komplikojnë negociatat për buxhetin afatgjatë 2028–2034.
Nëse Komisioni refuzon thirrjet e Parlamentit, procesi i miratimit mund të futet në ngërç, pasi në fund vendimi i ligjvënësve është vendimtar që buxheti të hyjë në fuqi.
Këto zhvillime shtojnë presion edhe mbi grupin liberal Renew Europe, i cili mbështet von der Leyen, por mbetet i përçarë në qëndrimin ndaj propozimit.
