Kryetari i Komunës së Prishtinës, Përparim Rama, ka reaguar ashpër përmes një njoftimi në Facebook lidhur me krizën e krijuar në kryeqytet për shkak të ndalimit të mbledhjes së mbeturinave nga ana e ndërmarrjes publike “Pastrimi”. Rama ka akuzuar menaxhmentin e kësaj ndërmarrjeje për sabotim të hapur politik dhe keqmenaxhim, duke theksuar se situata ka arritur kulmin me ndërprerjen e shërbimeve vetëm në territorin e Prishtinës.
“Ndonëse Komuna e Prishtinës është financuesi më i madh i kësaj ndërmarrjeje, shërbimi është ndalur në mënyrë selektive dhe të qëllimshme vetëm për Kryeqytetin – kjo është dëshmi e qartë për prapavijë politike”, ka shkruar Rama.
Ai theksoi se gjatë mandatit të tij, “Pastrimi” ka përfituar miliona euro nga Komuna, përfshirë:
-
11.5 milionë euro të hyra direkte përmes kontratave,
-
1.4 milionë euro për blerjen e kamionëve të rinj,
-
3,800 kontejnerë të rinj të financuar nga Komuna,
-
si dhe 400,000 euro subvencione shtesë.
Pavarësisht kësaj mbështetjeje, sipas Ramës, menaxhmenti i “Pastrimit” ka përdorur mjetet publike për:
-
rritje pagash për kryeshefin dhe menaxhmentin,
-
punësime të panevojshme dhe të motivuara politikisht.
Kryetari i Prishtinës ka bërë të ditur se kishte thirrur një seancë të jashtëzakonshme për 13 maj 2025, për të miratuar 300,000 euro subvencione për pagat e punëtorëve të “Pastrimit”, por seanca dështoi për shkak të bojkotit nga opozita.
Ai i ka quajtur të pavërteta deklaratat e menaxhmentit të “Pastrimit” se Komuna ka borxh 2.7 milionë euro, duke sqaruar se borxhi i Komunës ndaj kësaj ndërmarrjeje është zero.
Përballë kësaj situate që, sipas tij, rrezikon shëndetin publik, Rama ka paralajmëruar veprime të menjëhershme:
“Sonte, Kryeqyteti do të fillojë largimin e mbeturinave. Sabotazha nuk kalon!”
Ai shtoi se do të aktivizohen mekanizmat alternativë për pastrim, dhe paralajmëroi se Komuna po shqyrton të gjitha opsionet ligjore për të parandaluar përsëritjen e një situate të tillë.
“Qytetarët e Prishtinës meritojnë shërbim të denjë – jo shantazh politik,” përfundoi Rama në deklaratën e tij publike.
