Instituti ekonomik gjerman IW ka paralajmëruar se një pjesë e madhe e kompanive në ekonominë më të madhe të Evropës do të përballen me vendime të vështira gjatë vitit të ardhshëm. Sipas anketës më të fundit të institutit, deri në një të tretën e kompanive gjermane planifikojnë të reduktojnë numrin e punonjësve në vitin 2026.
Të dhënat tregojnë se numri i kompanive që do të pushojnë punëtorë është dyfish më i lartë se ai i kompanive që planifikojnë të punësojnë staf të ri. Situata është veçanërisht e rëndë në sektorin industrial, ku 41% e bizneseve njoftojnë shkurtime, ndërsa vetëm një në shtatë kompani parashikon zgjerim të fuqisë punëtore.
Pas dy vitesh stagnimi ekonomik, pritshmëritë për vitin e ardhshëm mbeten të përziera. Vetëm 25% e kompanive presin rritje të prodhimit apo të biznesit, ndërsa rreth 33% parashikojnë përkeqësim të mëtejshëm.
Sipas raportit, industria gjermane është nën presion të fortë për shkak të konflikteve tregtare, pasigurisë gjeopolitike, zinxhirëve të furnizimit të brishtë, si dhe kostove të larta të energjisë, punës dhe rregulloreve shtetërore.
Kriza afatgjatë po reflektohet edhe në planet e investimeve: një e treta e kompanive kanë paralajmëruar shkurtime në buxhetet e tyre investuese, ndërsa vetëm rreth një e katërta presin rritje të investimeve në periudhën e ardhshme.
